टोरंटो रॅप्टर्सने गोल्डन स्टेट वॉरियर्सला पाजले पाणी
मालिका ४-२ अशी जिंकत पटकावले पहिले एनबीए विजेतेपद
Image - Twitter - NBAएनबीए फायनल्सच्या आज झालेल्या सामन्यात टोरंटो रॅप्टर्सने गोल्डन स्टेट वॉरियर्सचा ११४-११० असा पराभव करत सात सामन्यांची मालिका ४-२ अशी जिंकत आपले पहिले एनबीए विजेतेपद पटकावले.
गोल्डन स्टेट यावर्षीदेखील विजेतेपद जिंकणार असे अनेकांना वाटण्यास अजून एक कारण म्हणजे त्यांची एनबीएमधील गेल्या पाच वर्षातील दहशत. गोल्डन स्टेटने २०१५ पासून ते २०१९ पर्यंत सलग पाच वर्षे वेस्टर्न कॉन्फरन्सची अंतिम फेरी गाठली. यातील २०१५,२०१७ आणि २०१८ या तीन वर्षी एनबीएचे विजेतेपदही मिळवले. म्हणूनच यावर्षीही विजय मिळवून ते विजयाची हॅटट्रिक करतील अशी अटकळ अनेकांनी बांधली होती. स्टेफ करी, ड्रेमंड ग्रीन, क्ले थॉम्पसन, आंद्रे इग्वाडोला यांच्यासारखे मोठे खेळाडू फर्स्ट टीममध्ये असताना गोल्डन स्टेट रॅप्टर्सला फारशी संधी देतील असे चित्र नव्हते.केविन डूरांटसारखा मोठा खेळाडू जखमी असूनही त्याचा गोल्डन स्टेटला काही फरक पडेल असे वाटत नव्हते. रॅप्टर्सने मात्र अंडरडॉगप्रमाणे खेळ करत गोल्डन स्टेटवर कायम वर्चस्व ठेवले. गोल्डन स्टेटच्या घरच्या कोर्टवर झालेले सलग दोन सामने जिंकत त्यांनी गोल्डन स्टेटचे मनोधैर्य खच्ची केले. क्वाही लेनर्डवर भिस्त असलेल्या रॅप्टर्सच्या संघाकडून पास्कल सियाकम, काईल लॉवरी, डॅनी ग्रीन या सगळ्यांनी वेळोवेळी आपला खेळ उंचावला. अगदी चौथा सामना जिंकून ३-१ अशी आघाडी घेतल्यानंतरही रॅप्टर्सच्या खेळाडूच्या चेहऱ्यावर हसू नव्हते. कामगिरी अजून फत्ते झाली नाही ही त्यामागची भावना होती.