हाऊस ऑफ हायलाईट्सचा स्वप्नवत प्रवास
जुलै २०१४ मध्ये मायामी हिट संघाचा स्टार खेळाडू लेब्रॉन जेम्स क्लिव्हलँड कॅव्हेलियर्सबरोबर करारबद्ध झाला. मायामी हिटकडून खेळताना त्याने या संघाला एनबीएची दोन विजेतेपदं मिळवून दिली. याचदरम्यान एक मुलगा या संघाचा कट्टर समर्थक बनला. ओमर राजा त्याचं नाव. लेब्रॉन हिट सोडून गेल्यानंतर तो निराश झाला. यातूनच त्याने मायामी हिटच्या सामान्यांचे हायलाईट्स पहायला सुरुवात केली. हे हायलाईट्स पाहताना एक गोष्ट त्याच्या लक्षात आली. ओमर आणि त्याचे मित्र मायामी हिटच्या सामन्यांतील काही क्षणांची वारंवार चर्चा करत. मात्र त्या क्षणांचे व्हिडीओ युट्युब, ईसपीएन यापैकी कुठल्याच वेबसाईटवर उपलब्ध नव्हते. आपल्या मित्रांबरोबर चर्चा करत असलेल्या या क्षणांचे व्हिडीओ कुठे ना कुठे तरी सापडतील या आशेतून ओमर कित्येक तास इंटरनेटवर घालवत असे. एक महिनाभर असे केल्यानंतर ‘आपणच हे का करू नये?’ असा विचार त्याच्या डोक्यातून आला. या विचारातूनच ऑगस्ट २०१४ मध्ये जन्म झाला हायलाईट फॅक्टरी या इंस्टाग्राम अकाउंटचा. आठवड्याभरातच ओमरला हे नाव नको असे वाटले म्हणून त्याने ते बदलून नाव ठेवले, ‘हाऊस ऑफ हायलाईट्स’. तिथून सुरु झाला एक स्वप्नवत प्रवास.